Старшыня Сената Польшчы: Беларусь ператварылася ў турму для беларусаў і прытулак для расійскіх агентаў

8 траўня, Позірк. “У мяне такое ўражанне, што Беларусь ператварылася цяпер у турму для беларусаў і прытулак для расійскіх агентаў”, — заявіла старшыня Сената Польшчы Малгажата Кідава-Блоньска на адкрыцці выставы, прысвечанай палітзняволенаму праваабаронцу Алесю Бяляцкаму 8 траўня ў верхняй палаце польскага парламента.

“Гэтая пагроза нашай свабодзе і дэмакратыі ёсць увесь час. І мы адчуваем гэта ўсё больш і больш, у прыватнасці, дадаткова перад тварам вайны ва Украіне”, — дадала палітык.

На яе думку, сітуацыя патрабуе супольнай “барацьбы са злом”.

Бяляцкі атрымаў прысуд за тое, што “хацеў свабоднай, дэмакратычнай Беларусі”, лічыць Кідава-Блоньска: “Для яго заўсёды найважнейшым былі правы людзей, годнасць чалавека”.

Праваабаронца змагаўся за тое, каб Беларусь стала “краінай, дзе кожны можа адчуваць сябе ў бяспецы, рэалізоўвацца”, адзначыла яна.

Бяляцкі з’яўляецца “героем усёй Еўропы, а, можна сказаць, і ўсяго свету”, заключыла кіраўніца Сената.

Ініцыятарам правядзення выставы выступіў старшыня камісіі па замежных справах Сената Гжэгаж Схетына. Ён назваў Бяляцкага “знакам вольнай Беларусі”.

Праваабаронца “ніколі не займаўся палітыкай, заўсёды быў на баку найслабых, дапамагаў рэпрэсаваным”, сказаў сенатар.

Схетына параўнаў Бяляцкага з іншым палітвязнем, актывістам не прызнаванага Мінскам Саюза палякаў у Беларусі, журналістам Анждэем Пачобутам, які, паводле яго слоў, для Польшчы выступае “сімвалам рашучасці, барацьбы за базавыя [рэчы]”.

“Мы заўсёды будзем падтрымліваць апазіцыю ў Беларусі, тых, хто змагаецца за грамадзянскія правы, правы чалавека”, — сказаў на заканчэнне кіраўнік камісіі.

Рэжым Аляксандра Лукашэнкі “ператварае Беларусь у адну вялікую турму і ваенную базу”, заявіў намеснік старшыні Аб’яднанага пераходнага кабінета Беларусі, кіраўнік Народнага антыкрызіснага ўпраўлення Павел Латушка.

“Можа быць, ⟨…⟩ свет выглядае зараз так, таму што лаўрэата Нобелеўскай прэміі міру можна на вачах ва ўсяго свету пасадзіць у турму і не панесці за гэта ніякай адказнасці? Можа, выглядае так, [таму што] можна проста кінуць за краты, катаваць, гвалтаваць, забіваць тысячы нявінных людзей і не панесці за гэта ніякай адказнасці? У мяне ўзнікае пытанне: можа, свет баіцца Лукашэнку?” — адзначыў ён.

Выстава арганізавана “Беларускім домам” у Варшаве.

3 сакавіка 2023 года ў межах палітычна матываванай справы старшыня праваабарончага цэнтру “Вясна” Бяляцкі быў прыгавораны да 10 гадоў пазбаўлення волі, яго намеснік і віцэ-прэзідэнт Міжнароднай федэрацыі за правы чалавека (FIDH) Валянцін Стэфановіч — да 9, каардынатар кампаніі “Праваабаронцы за свабодныя”. выбары” Уладзімір Лабковіч — да 7. Праваабаронца Дзмітрый Салаўёў, які знаходзіцца за мяжой, завочна асуджаны на 8 гадоў зняволення.

21 снежня міжнародная юрыдычная група, якая займаецца сітуацыяй з Бяляцкім, падала петыцыю ў працоўную групу ААН па адвольных затрыманнях. На думку юрыстаў, праваабаронцу пратрымалі “без якіх-небудзь юрыдычных падстаў” 17 месяцаў, перш чым ён паўстаў перад судом. Акрамя таго, судовы працэс “быў азмрочаны абуральнымі парушэннямі належнай прававой працэдуры”.

Адзначалася таксама, што “з моманту арышту ў ліпені 2021 года Бяляцкі мае вельмі абмежаваныя зносіны са сваёй сям’ёй, адвакатам і навакольным светам”.

У 2022 годзе Бяляцкі стаў лаўрэатам Нобелеўскай прэміі міру. 10 снежня ў Осла прэмія была ўручана ягонай жонцы Наталлі Пінчук.

Паводле рашэння Нобелеўскага камітэта ў прэмія была падзелена паміж праваабаронцамі: Бяляцкім, украінскім Цэнтрам грамадзянскіх свабод і расійскім таварыствам “Мемарыял”.