Польшча — аб’ект нумар адзін для паражэння ядзернай зброяй, заявіў супрацоўнік Ваеннай акадэміі

24 траўня, Позірк. Польшча — “аб’ект нумар адзін для паражэння ядзернай зброяй”, заявіў намеснік начальніка факультэта Генеральнага штаба Узброеных сіл Ваеннай акадэміі Андрэй Багадэль у эфіры Першага нацыянальнага канала беларускага радыё 23 траўня.

Польшча сама “абрала для сябе менавіта такую долю”, лічыць ён.

У якасці аргументаў Багадзель прывёў размяшчэнне ў польскім Рэдзікава (Паморскае ваяводства) базы супрацьракетнай абароны ЗША, які з’яўляецца “аб’ектам падвойнага прызначэння”.

“У радыусе паражэння аказваецца не толькі Беларусь, але і еўрапейская частка Расійскай Федэрацыі, уключаючы такія гарады як, напрыклад, Масква і Ленінград (маецца на ўвазе Санкт-Пецярбург. — “Позірк”.)”, — сказаў Багадзель.

Ён выказаў меркаванне, што размяшчэнне кантынгентаў ЗША на тэрыторыі Польшчы сведчыць аб тым, што гэтай краіне будзе адводзіцца нейкая “вельмі важная роля ў будучым светаўладкаванні” Еўропы.

Багадэль лічыць, што мэта ЗША — уцягнуць Расію ў “вайну у доўгую”. Паводле яго слоў, гэта адбываецца з мэтай “стратэгічнай паразы Расіі ў палітычных, эканамічных і ментальных сферах”.

На яго думку, з’яўленне тактычнай ядзернай зброі РФ у Беларусі “вельмі моцна ашаламіла Захад”.

7 траўня Аляксандр Лукашэнка распарадзіўся правесці ў Беларусі “раптоўную праверку сродкаў — носьбітаў нестратэгічнай ядзернай зброі” з “падачай спецбоепрыпасаў у ракетныя і авіяцыйныя воінскія часці”, загрузкай на пускавыя ўстаноўкі і падвескай на самалёты.

Праверка праводзіцца на фоне аналагічнай у Расіі.

Амерыканскі Інстытут вывучэння вайны (ISW), прааналізаваўшы рыторыку прадстаўнікоў рэжымаў у Маскве і Мінску, выказаў меркаванне, што “ні Расія, ні Беларусь не імкнуцца да ядзернай эскалацыі, прымяненне імі ядзернай зброі застаецца малаверагодным”.