Праваабаронцы паведамілі пра пажар у бабруйскай калоніі — адміністрацыя спрабавала схаваць інфармацыю

26 траўня, Позірк. На тэрыторыі папраўчай калоніі № 2 у Бабруйску (Магілёўская вобласць) адбыўся пажар, паведамляе праваабарончы тэлеграм-канал MAYDAY.TEAM.

Адзначаецца, што інцыдэнт здарыўся 23 траўня ў “будынку, дзе знаходзіцца турэмная крама (так званая “атаварка” для асуджаных)”.

Праваабаронцы сцвярджаюць, што адміністрацыя ПК “хацела схаваць факт, але ў калонію давялося выклікаць пажарны разлік, і інфармацыя выйшла за сцены ўстановы”.

“Нягледзячы на моцнае задымленне, узгаранне аказалася нескладаным і было хутка патушана, аднак пажарныя забаранілі карыстацца памяшканнем”, — гаворыцца ў паведамленні.

Паводле інфармацыі тэлеграм-канала, цягам двух гадоў у бабруйскай калоніі “сіламі зняволеных і за іх кошт вядзецца бясконцы рамонт”. Цяпер у планах адміністрацыі — “павелічэнне плошчы памяшкання для прыёму перадач і кароткатэрміновых спатканняў”.

Паводле звестак праваабарончага цэнтра “Вясна”, у ПК № 2 адбывае пакаранне 89 палітвязняў. У іх ліку — Эдуард Бабарыка (сын экс-прэтэндэнта на пасаду прэзідэнта Віктара Бабарыкі), асуджаны на 8 гадоў пазбаўлення волі, прыгавораныя па “справе “Рабочага руху” Сяргей Шэлест (14 гадоў зняволення), Андрэй Пагерыла (14) і Аляксандр Капшуль (15), журналіст Павел Мажэйка (6), адзін з лідараў незалежнага прафсаюзнага руху Генадзь Фядыніч (9), лекар, сківічна-тварны хірург Андрэй Любецкі (5).