26 чэрвеня, Позірк. Урад Германіі занепакоены прысудам суайчынніку ў Беларусі, аднак не каментуе, ці можа ён быць уключаны ў спіс абмену зняволенымі, вынікае з публікацыі выдання Politico.
“Канцлер, вядома, у курсе гэтай справы і, як і ўвесь урад, занепакоены гэтымі падзеямі, асабліва ў сувязі са смяротным прысудам”, — цытуе выданне заяву прадстаўніка ўрада ФРГ на прэс-канферэнцыі ў Берліне 26 ліпеня.
23 ліпеня канцлер ФРГ Олаф Шольц таксама адмовіўся каментаваць магчымы абмен меркаванага афіцэра ФСБ Расіі Вадзіма Красікава, прыгаворанага ў Германіі да пажыццёвага тэрміну, у тым ліку на Крыгера, паведаміла руская служба “Радыё Свабода”.
“Прынцып захавання дзяржаўных інтарэсаў не дазваляе мне спекуляваць на такія тэмы”, — сказаў Шольц.
На дзяржаўным тэлеканале “Беларусь 1” увечары 25 ліпеня паказалі маналог Крыгера. Ён распавёў пра сустрэчу з нямецкімі дыпламатамі і пра тое, што яны мелі магчымасць сачыць за судовым працэсам, але адмовіліся дапамагчы.
24 чэрвеня Мінскі абласны суд пад старшынствам Алега Лапека вынес смяротны вырак Крыгеру. Вядома аб гэтым стала 19 ліпеня.
Грамадзянін ФРГ прызнаны вінаватым па ч. 4 арт. 295 (незаконныя дзеянні ў адносінах да агнястрэльнай зброі, боепрыпасаў і выбуховых рэчываў), ч. 4 арт. 309 (наўмыснае прывядзенне ў непрыдатнасць транспартнага сродку або шляхоў зносін), ч. 3 арт. 3611 (стварэнне экстрэмісцкага фарміравання або ўдзел у ім), ч. 3 арт. 289 (акт тэрарызму), арт. 3581 (агентурная дзейнасць) і арт. 133 (наёмніцтва) Крымінальнага кодэкса.
У згаданым сюжэце на дзяржТВ сцвярджалася, што Крыгер быў завербаваны Службай бяспекі Украіны для здзяйснення тэрактаў у Беларусі.
Прадстаўнік МЗС Германіі Крысціян Вагнер на прэс-канферэнцыі ў Берліне 22 ліпеня заявіў, што Берлін “абараняе інтарэсы прыгаворанага да смяротнага пакарання грамадзяніна ФРГ Рыка Крыгера перад беларускімі ўладамі”.
МЗС Беларусі 20 ліпеня паведаміла, што беларускі бок прапанаваў Германіі “канкрэтныя рашэнні па наяўных варыянтах развіцця сітуацыі”.
24 лютага 2022 года Расія пачала поўнамаштабную вайну супраць Украіны, называючы яе “спецыяльнай ваеннай аперацыяй”.
На першапачатковым этапе ўварвання беларуская тэрыторыя актыўна выкарыстоўвалася для ўводу войскаў, а таксама абстрэлу ўкраінскай тэрыторыі. Аляксандр Лукашэнка неаднаразова заяўляў, што падтрымлівае РФ у яе дзеяннях.
