МЗС ФРГ зноў адмовіўся каментаваць магчымы абмен Крыгера

31 ліпеня, Позірк. Нямецкі бок імкнецца да таго, каб памілаваны Аляксандрам Лукашэнкам грамадзянін ФРГ Рыка Крыгер вярнуўся на радзіму “як мага хутчэй”, паведамляе “DW Беларусь” са спасылкай на прэс-сакратара МЗС Германіі Себасцьяна Фішэра.

На прэс-канферэнцыі ўрада ён не стаў адказваць на пытанне, ці выстаўляў Мінск якія-небудзь умовы па Крыгеру. “Я не хачу каментаваць, што заахвоціла спадара Лукашэнку памілаваць нямецкага грамадзяніна. Магу толькі сказаць, што гэтая навіна прынесла нам палягчэнне”, — заявіў Фішэр.

На пытанне, ці звязанае памілаванне з магчымым абменам беларускіх ці расійскіх палітвязняў, прадстаўнік МЗС, як і раней, адказваць адмовіўся.

Меркаванне пра тое, што Крыгер можа стаць прадметам нейкага абмену зняволенымі, у якім будуць удзельнічаць не толькі Германія і Беларусь, але і Расія і ЗША, выказваецца ў шэрагу заходніх СМІ.

24 чэрвеня Мінскі абласны суд (суддзя Алег Лапека) вынес Крыгеру смяротны прыгавор. Мужчына быў прызнаны вінаватым паводле ч. 4 арт. 295 (незаконныя дзеянні ў дачыненні да агнястрэльнай зброі, боепрыпасаў і выбуховых рэчываў), ч. 4 арт. 309 (наўмыснае прывядзенне ў непрыдатнасць транспартнага сродку або шляхоў зносін), ч. 3 арт. 361¹ (стварэнне экстрэмісцкага фарміравання або ўдзел у ім), ч. 3 арт. 289 (акт тэрарызму), арт. 358¹(агентурная дзейнасць) і арт. 133 (наёмніцтва) Крымінальнага кодэкса.

МЗС Беларусі 20 ліпеня паведаміла, што беларускі бок прапанаваў Германіі “канкрэтныя рашэнні па наяўных варыянтах развіцця сітуацыі”.

30 ліпеня стала вядома, што Крыгер звярнуўся да Лукашэнкі з прашэннем аб памілаванні. У той самы дзень грамадзянін ФРГ быў памілаваны.

За тыдзень да гэтага, 23 ліпеня, канцлер ФРГ Олаф Шольц адмовіўся каментаваць магчымы абмен афіцэра ФСБ Расіі Вадзіма Красікава, прыгаворанага ў Германіі да пажыццёвага тэрміну, у тым ліку на Крыгера. “Прынцып захавання дзяржаўных інтарэсаў не дазваляе мне спекуляваць на такія тэмы”, — сказаў Шольц.

На тэлеканале “Беларусь 1” 25 ліпеня быў паказаны маналог Крыгера. Ён расказаў пра сустрэчу з нямецкімі дыпламатамі і пра тое, што яны мелі магчымасць сачыць за судовым працэсам, але нібыта адмовіліся дапамагчы. У сюжэце сцвярджалася, што Крыгер быў завербаваны Службай бяспекі Украіны для здзяйснення тэрактаў у Беларусі.