Пракуратура Варшавы пацвердзіла ператрусы ў штаб-кватэры “Белсату “(абноўлена)

20 лістапада, Позірк. Цэнтральнае антыкарупцыйнае бюро (ЦАБ) займаецца зборам дакументацыі ў рамках расследавання, якое праводзіцца акруговай пракуратурай Варшавы ў дачыненні да кампаніі Belsat. Пра гэта паведамляе Polska Agencja Prasowa (PAP).

Прэс-сакратар міністра — каардынатара спецыяльных службаў, кіраўніка Міністэрства ўнутраных спраў і адміністрацыі Яцэк Дабжыньскі паведаміў агенцтву, што супрацоўнікі ЦАБ “праводзяць працу ў будынку Польскага грамадскага вяшчання (TVP) у рамках пракурорскага расследавання”.

Прэс-сакратар акруговай пракуратуры ў Варшаве Пётр Скіба ўдакладніў, што ператрусы праводзяцца “ў штаб-кватэры TV Belsat”.

Следчыя дзеянні, паводле яго слоў, звязаныя з расследаваннем “прычынення буйной маёмаснай шкоды TVP SA ў перыяд са жніўня 2018 года да студзеня 2024 года асобамі, якія займаюцца яе маёмаснымі справамі, на агульную суму больш за 7 млн злотых (больш за 1,7 млн долараў у эквіваленце на 20 лістапада. — “Позірк”.) шляхам заключэння дагавораў на наданне IT-паслуг і заказаў на закупку з пэўнымі прадпрымальнікамі”.

“Расследаванне таксама вядзецца ў дачыненні да выстаўлення з красавіка 2019 года да студзеня 2024 года з мэтай атрымання прыбытку недакладных рахункаў-фактур з ПДВ на агульную суму 5.147.000 злотых (блізу 1,3 млн долараў. — “Позірк”.), дакументальна пацвярджаюць і фармуюць аснову бухгалтарскіх разлікаў за IT-паслугі, фактычна не нададзеныя TVP SA кампаніяй, якая дзейнічае ў складзе пэўных кампаній”, — паведаміў Скіба.

Кіраўнік аддзела камунікацый TVP Томаш Вадерек заявіў PAP, што Telewizja Polska “надала поўную падтрымку супрацоўнікам ЦАБ і перадала ўсе дакументы, названыя ў распараджэнні аб правядзенні праверкі”.

У тэлеграм-канале “Белсату” падкрэсліваецца, што ўсе рэдакцыі працуюць у звычайным рэжыме.

Раней Gazeta Wyborcza паведаміла, што супрацоўнікі (ЦАБ) раніцай 20 лістапада “ўвайшлі ў будынак” TVP у рамках “расследавання злоўжыванняў” на тэлеканале “Белсат”. Выданне таксама напісала пра ператрус у кватэры былога дырэктара “Белсата” Агнешкі Рамашэўскай-Гузы. Яна абвергла гэта.

15 лістапада стала вядома, што “Белсат” узначаліць яго былая супрацоўніца Аліна Коўшык, у сувязі з чым яна пакінула пасаду прадстаўніцы Аб’яднанага пераходнага кабінета (АПК) па нацыянальным адраджэнні.

Да прыходу ў АПК у верасні 2022 года Коўшык 15 гадоў працавала на “Белсаце”, у тым ліку галоўнай вядучай, рэдактарам і прадзюсерам тэлепраграм. Яна таксама была сузаснавальніцай Беларускага цэнтра салідарнасці ў Варшаве, праекта InBelKult 2.0, клуба “Беларускі Варшавы”.

В.а. дырэктара тэлеканала “Белсат” Аляксей Дзікавіцкі, які павінен быў заставацца на пасадзе да 3 снежня, падаў кіраўніцтву TVР заяву аб датэрміновым звальненні 22 лістапада.

19 ліпеня на польскім партале Onet выйшаў артыкул, у якім сцвярджалася, што 10 менеджараў тэлеканала падазраюцца ў дачыненні да фінансавых парушэнняў на “Белсаце”, у іх ліку называліся кіраўнік Агнешка Рамашэўска-Гузы і яе тагачасны намеснік Дзікавіцкі.

Паведамлялася, што кіраўніцтва канала падазраюць у заключэнні без тэндэру 248 кантрактаў, многія з іх не былі выкананыя.

Цяперашнія і былыя менеджары “Белсата” 23 ліпеня выступілі з заявай, у якой выказалі пратэст “супраць паклёпу”, апублікаванага Onet. Дзікавіцкі адразу пасля выхаду матэрыялу напісаў, што інфармацыя з’яўляецца “няпраўдай і паклёпам”.

8 ліпеня журналісты-расследавальнікі Radio ZET і RadioZET.pl Марыюш Гершэўскі і Радаслаў Груца паведамілі, што ліквідатар TVP Даніэль Горгаш “апавясціў пракуратуру пра фінансавыя парушэнні” на “Белсаце”. На наступны дзень Рамашэўска-Гузы абвергла абвінавачанні.

На пачатку ліпеня стала вядома, што “Белсат” плануецца ўключыць у склад новай медыяструктуры — Цэнтра замежных праграм (ЦЗП), які аб’яднае тэлеканалы, што вяшчаюць на замежных мовах. Дэмсілы і каманда “Белсата” заклікалі кіраўніцтва Польшчы і TVP захаваць самастойнасць беларускага тэлеканала.

Асноўная крыніца фінансавання “Белсата” — МЗС Польшчы.

Урад прэм’ер-міністра Дональда Туска пасля прыходу да ўлады па выніках праведзеных у кастрычніку 2023 года парламенцкіх выбараў пачаў рэвізію грамадскіх і дзяржаўных СМІ, якія, на яго думку, адстойвалі інтарэсы толькі былой кіруючай партыі-канкурэнта “Права і справядлівасць”.

Тэлеканал “Белсат” створаны для вяшчання на Беларусь у 2007 годзе на падставе дамовы паміж МЗС Польшчы і TVP.

Абнаўленне.

Аляксей Дзікавіцкі 20 лістапада адмовіўся ад каментароў “Позірку”, спаслаўшыся на занятасць.