Пошліны на вываз з Беларусі шэрагу вуглевадародаў зніжаныя амаль на 60%

7 лютага, Позірк. Мытныя пошліны на шэраг вуглевадародаў, якія вывозяцца з Беларусі за межы Еўразійскага эканамічнага саюза, з 1 лютага 2025 года зніжаныя амаль на 60%, вынікае з пастановы Савета міністраў № 72 ад 5 лютага.

Згодна з дакументам, апублікаваным на Нацыянальным прававым інтэрнет-партале 7 лютага, экспартная пошліна на звадкаваныя вуглевадародныя газы цяпер складае 7,5 долара за тону (на 1 студзеня 2025 года — 18,5, зніжэнне на 59,5%); на этан, бутан і ізабутан — 6,7 (16,6; -59,6%).

На пачатку мінулага года стаўкі на вываз гэтых рэсурсаў складалі 1,6 і 1,4 долара адпаведна. З лютага 2024-га на працягу сямі месяцаў пошліны былі роўныя нулю. У верасні ўрад вярнуў стаўкі — 20,8 і 18,7 долара адпаведна, у кастрычніку яны выраслі да 45,2 і 40,6, снежні — да 61,7 і 55,5.

Ад пачатку 2024 года застаюцца нулявымі пошліны на вываз сырой нафты, мазуту, нафтавага бітуму, вазеліну і парафіна, адпрацаваных нафтапрадуктаў (на 1 снежня 2023 года — 24,7 долара за т), прамагоннага бензіну (13,5), таварных бензінаў, дызельнага паліва, лёгкіх, сярэдніх дыстылятаў, бензолу, талуолу, ксілолаў, змазачных аліваў (7,4).

Стаўкі разлічваюцца паводле пэўнай формулы і залежаць ад кошту сыравіны на сусветных рынках. Беларускія пошліны роўныя расійскім.