Ціханоўская і Метсола абмеркавалі сітуацыю з палітвязнямі і супрацоўніцтва паміж Еўрапарламентам і дэмсіламі

11 сакавіка, Позірк. Стан палітвязняў і супрацоўніцтва паміж Еўрапарламентам і беларускімі дэмакратычнымі сіламі абмеркавалі дэмакратычны лідар Светлана Ціханоўская і старшыня Еўрапарламента Раберта Метсола 11 сакавіка ў Страсбургу (Францыя).

Ціханоўская, як паведамляе яе прэс-служба, праінфармавала Метсолу аб стане палітвязняў у Беларусі і падзялілася высновамі дакладу праваабарончага цэнтра “Вясна” аб сістэматычных парушэннях правоў жанчын у зняволенні.

Яна падкрэсліла важнасць актыўнага ўзаемадзеяння дэмсіл з еўрапейскімі структурамі. Палітыкі абмеркавалі магчымасць больш шырокага прадстаўніцтва беларускіх дэмакратычных сіл на мерапрыемствах Еўрапарламента.

Таксама дэмлідар адзначыла “жыццёвую неабходнасць падтрымкі незалежнай журналістыкі і праваабарончых ініцыятыў”, гаворыцца ў паведамленні.

Адзначаецца, што на сустрэчы прысутнічала былая палітзняволеная Паліна Шарэнда-Панасюк, якая “падчас свайго зняволення стала сімвалічнай хрэснай дачкой Метсолы”.

Ціханоўская 11 сакавіка прыняла ўдзел у пленарнай сесіі Еўрапейскага парламента ў Страсбургу.

Метсола займае пасаду кіраўніка ЕП з 2022 года.

10 лютага Ціханоўская і Метсола сустракаліся ў Брусэлі.

22 студзеня Еўрапарламент прыняў рэзалюцыю пра непрызнанне шостых беларускіх прэзідэнцкіх выбараў і легітымнасці Аляксандра Лукашэнкі. 25 студзеня, за дзень да асноўнага дня галасавання, Метсола назвала кампанію фікцыяй.

Летась 3 траўня на Мальце ў межах візіту Ціханоўскай было падпісана пагадненне аб супрацоўніцтве паміж Еўрапейскім парламентам і беларускімі дэмакратычнымі сіламі.

Метсола назвала дакумент “моцным сігналам” рашучасці “ўмацоўваць сувязі і дэманстраваць падтрымку” і знакам “цвёрдай прыхільнасці парламента развіццю супрацоўніцтва з дэмакратычнымі сіламі і грамадзянскай супольнасцю Беларусі ў іх змаганні за свабодную, незалежную і дэмакратычную краіну”.