У Мінску згарэў аўтобус МАЗ

16 сакавіка, Позірк. Аб узгаранні аўтобуса ў Мінску паведаміў 16 сакавіка тэлеграм-канал Дзяржаўтаінспекцыі Мінгарвыканкама.

Гэта адбылося на скрыжаванні Лагойскага тракту і вуліцы Гамарніка, з-за здарэння абмежаваны рух, адзначае ДАІ.

“На месцы здарэння працуюць супрацоўнікі аддзела ДАІ Савецкага РУУС і МНС”, — гаворыцца ў паведамленні.

На апублікаваным ведамствам фота не бачная марка палаючага аўтобуса, аднак з публікацый у іншых тэлеграм-каналах вынікае, што гэта МАЗ.

Партал “Онлайнер” паведамляе, што аўтобус загарэўся каля 16.40.

Неўзабаве пажар быў ліквідаваны, інфармацыі аб пацярпелых няма.

“Транспартны сродак выгарэў цалкам менш, чым за 15 хвілін”, — адзначаецца ў публікацыі.

26 чэрвеня 2024 года паведамлялася, што ў Навабеліцкім раёне Гомеля загарэўся аўтобус МАЗ. Гаворка ішла аб грамадскім транспарце 12-га маршруту.

21 траўня паведамлялася аб задымленні ў сталіцы двух аўтобусаў грамадскага транспарту.

У мікрараёне Уручча ў выніку “закліноўвання генератара” задыміўся аўтобус МАЗ. Сцвярджалася, што “адбылося расслаенне і абрыў прываднага рамяня”, для тушэння кіроўца скарыстаўся вогнетушыцелем.

Таксама СМІ паведамілі пра задымленне аўтобуса № 84 на прыпынку “Пятроўшчына”.

“Там спрацавала сістэма пажаратушэння. Кіроўца прыняў неадкладныя меры па абясточванні аўтобуса. Узгарання не было. Пацярпелых няма”, — удакладнялася ў публікацыі.

Марка аўтобуса не называлася.

19 траўня стала вядома, што ў Мінску на праспекце Машэрава згарэў аўтобус МАЗ. Транспартны сродак выгарэў цалкам. МНС адзначыла, што ніхто не пацярпеў.

Аўтобусы МАЗ рэгулярна загараюцца ў Расіі, прычынай гэтага называюцца санкцыі, уведзеныя супраць прадпрыемства. Апошні падобны выпадак быў зафіксаваны 13 студзеня ў Ліпецку.