Гомельскія мытнікі спынілі ўвоз з Расіі 18 тон макарон

7 ліпеня, Позірк. Пры правядзенні спецыяльных мерапрыемстваў на беларуска-расійскай мяжы супрацоўнікі гомельскай мытні спынілі незаконны ўвоз у Беларусь больш за 18 тон макаронных вырабаў на суму 66 тыс. рублёў.

Як паведамляе Дзяржаўны мытны камітэт (ДМК), тавар перамяшчаўся з Расіі ў грузавіку Shacman пад кіраваннем грамадзяніна Беларусі. У яго, як адзначаецца, адсутнічалі таварасуправаджальныя дакументы на груз, у тым ліку якія пацвярджаюць якасць прадукцыі.

ДМК пачаў у дачыненні да кіроўцы адміністрацыйны працэс паводле арт. 13.12 КаАП (парушэнне парадку набыцця, захоўвання, выкарыстання ў вытворчасці, транспарціроўкі, водпуску і рэалізацыі тавараў).

Санкцыя артыкула прадугледжвае штраф да 50% ад кошту тавару.

Гл. таксама:

За апошні месяц мытня Беларусі не прапусціла ў РФ 105 т яблыкаў і груш

Мытнікі прадухілілі вываз у Расію 28 тон сыру