Лукашэнка чакае візіту прэзідэнта Лаоса ў Беларусь

10 лістапада, Позірк. Візіту прэзідэнта Лаоса Тханглуна Сісуліта ў “гасцінную Беларусь” для абмеркавання “пытанняў па практычнай рэалізацыі дамоўленасцяў і вызначэнні новых магчымасцей для раскрыцця існага патэнцыялу беларуска-лаоскіх стасункаў” чакае Аляксандр Лукашэнка.

Віншуючы кіраўніка Лаоса з 79-годдзем 10 лістапада, беларускі палітык заявіў, што “з цеплынёй” успамінае сустрэчу з ім у Казані на палях саміту БРІКС летась у кастрычніку.

“Вас ведаюць як выбітнага дзяржаўнага і партыйнага дзеяча, сапраўднага патрыёта сваёй радзімы, які аддае ўсе сілы дзеля развіцця Лаоса, умацавання яго ролі і аўтарытэту ў рэгіёне і свеце, паляпшэння жыцця грамадзян”, — прыводзіць тэкст паслання прэс-служба віншавальніка.

МЗС Беларусі яшчэ сёлета ў ліпені анансавала візіт Сісуліта.

3 лістапада Лукашэнка падпісаў закон, які ратыфікуе пагадненне з урадам Лаоса аб узаемным скасаванні віз для кароткатэрміновага знаходжання.

Мінск і В’енцьян усталявалі дыпламатычныя стасункі 7 лютага 1994 года.