Беларусь ініцыюе скліканне экстранага пасяджэння Савета бяспекі ААН, але паведамляе пра гэта РФ

26 чэрвеня, Позірк. Запыт Беларусі на скліканне экстранага пасяджэння Савета Бяспекі ААН у сувязі з атакай на аўтобус у Бранскай вобласці падтрымала Расія, заявіла в.а. пастаяннага прадстаўніка РФ пры ААН Ганна Еўсцігнеева.

Еўсцігнеева назвала атаку “наўмысным ударам УСУ па аўтобусе, які перавозіў мірных жыхароў – беларускіх грамадзян, уключаючы дзяцей” (цытата паводле расійскіх дзяржСМІ).

“Разлічваем, што члены Савета Бяспекі дадуць прынцыповую ацэнку гэтаму злачынству супраць грамадзянскага насельніцтва”, — дадала яна.

Інфармацыі аб тым, што Мінск мае намер склікаць пасяджэнне Савета бяспекі няма ні на сайце МЗС Беларусі, ні на старонцы пастаяннага прадстаўніцтва краіны пры ААН, ні ў акаўнтах МЗС у сацсетках названых ведамстваў. Не паведамляюць аб гэтым і беларускія дзяржСМІ.

17 чэрвеня аўтобус з выхаванцамі згаданай школы патрапіў пад удар. У транспартным сродку знаходзіліся 44 пасажыры, з іх 28 дзяцей-спартсменаў 2014–2015 гадоў нараджэння.

Сярод дзяцей, якія суправаджалі, была жонка трэнера з Рэчыцкай ДЮСШ-2 Вікторыя Гарошка, яна загінула. Жанчына родам з Луганска (акупаваная тэрыторыя Украіны), доўга жыла ў Беларусі.

Першапачаткова заяўлялася, што пацярпелі восем чалавек, у тым ліку шасцёра дзяцей. Пазней МЗС Беларусі ўдакладніла, што пацярпелых шэсць (пяць — дзеці). Раніцай 18 чэрвеня пецярых дзяцей і аднаго дарослага з расійскіх бальніц павезлі ў медустановы Мінска.

Расійскія, а ўслед за імі і беларускія ўлады і прапаганда адразу абвінавацілі ў тым, што здарылася Украіну.

У дзень інцыдэнту Генеральны штаб Узброеных сіл Украіны заявіў, што ўкраінскі бок не мае дачынення да ўдару па аўтобусе. Абвінавачанні названыя “чарговай інфармацыйнай правакацыяй Крамля”.

Лукашэнка ж заявіў, што ў аўтобус з беларускімі дзецьмі патрапіў менавіта ўкраінскі робат.

Выданне The Wall Street Journal (WSJ) 23 чэрвеня са спасылкай на былых, а таксама цяперашніх еўрапейскіх і расійскіх чыноўнікаў паведаміла аб узмацненні ціску на Беларусь з боку Расіі, каб яшчэ больш уцягнуць яе ў вайну з Украінай.

Паводле іх, Масква хоча выкарыстоўваць беларускую тэрыторыю, каб пашырыць удары беспілотнікамі па Украіне, адцягнуць частку ўкраінскіх войскаў з усходняга фронта, а таксама праводзіць аперацыі супраць суседніх з Беларуссю краін НАТО.