Рыжанкоў запрасіў на вучобу ў Беларусь грамадзян Мазамбіка

10 ліпеня, Позірк. “Шырэй выкарыстоўваць магчымасці” навучання грамадзян Мазамбіка ў Беларусі па запатрабаваных напрамках прапанаваў на сустрэчы 10 ліпеня міністр замежных спраў Максім Рыжанкоў выканаўчаму каардынатару Цэнтральнага офіса па рэформах і стратэгічных праектах пры прэзідэнце гэтай афрыканскай краіны Жаау Ашвалду Машаціні, паведамляе прэс-служба беларускага знешнепалітычнага ведамства.

Такімі напрамкамі, як паведамляецца, могуць быць спецыяльнасці ў галінах сельскай гаспадаркі, аховы здароўя, інфармацыйных тэхналогій, а таксама “падрыхтоўка кадраў у сферы абароны і бяспекі”.

Адзначаецца, што бакі таксама абмеркавалі на сустрэчы пытанні “нарошчвання двухбаковага эканамічнага супрацоўніцтва, рэалізацыі праектаў у галіне механізацыі сельскай гаспадаркі Мазамбіка і харчовай бяспекі”.

“Суразмоўцы надалі асаблівую ўвагу развіццю дагаворна-прававой базы двухбаковага супрацоўніцтва і падрыхтоўцы да падпісання пагадненняў па пытаннях устанаўлення бязвізавага рэжыму для ўладальнікаў дыпламатычных і службовых пашпартоў, аховы здароўя, адукацыі, культуры і іншых, якія будуць садзейнічаць умацаванню дружалюбных сувязяў паміж нашымі краінамі”, — гаворыцца ў паведамленні.

Чыноўнікі таксама дамовіліся “прапрацаваць сумесныя лагістычныя праекты, уключаючы выкарыстанне партоў Мазамбіка для выхаду беларускай прадукцыі на рынкі Паўднёвай Афрыкі”. 

Аляксандр Лукашэнка ў віншаванні прэзідэнту краіны Даніэлу Франсішку Шапу з Днём незалежнасці адзначыў, што Беларусь разглядае Мазамбік як “стратэгічны пункт апоры на паўднёва-ўсходнім узбярэжжы Афрыкі” і гатовая да далейшага паглыблення двухбаковага супрацоўніцтва “ў тым ліку з удзелам суседніх дзяржаў рэгіёна”.

30 красавіка паведамлялася, што ўпершыню ў гісторыі адносін з Мазамбікам у Беларусі акрэдытаваны ваенны дыпламат з гэтай афрыканскай краіны — акрэдытаваны аташэ па пытаннях абароны пры пасольстве Мазамбіка ў Расіі і Беларусі (па сумяшчальніцтве) палкоўнік Педру Ціагу Каува.

Сумесна займацца будаўніцтвам порта ў афрыканскай краіне прапанаваў Лукашэнку 19 лютага ў Мінску прадстаўніку яе заходняга суседа — старшыні Сената Зімбабвэ Мейбл Мемары Чынамонэ.

Інтарэсы Мінска ў Мазамбіку прадстаўляе амбасадар у Паўднёва-Афрыканскай Рэспубліцы (цяпер пасаду займае Ігар Белы). Паводле даных амбасады ў ПАР, у 2021 годзе тавараабарот Беларусі і Мазамбіка склаў 957,9 тыс. долараў (беларускі экспарт — 742,1 тыс.).

У чэрвені 2025 года Беларусь наведваў міністр сельскай гаспадаркі, навакольнага асяроддзя і рыбалоўства Мазамбіка Роберту Міту Альбіну.

Лукашэнка неаднаразова пацвярджаў гатоўнасць прыняць прэзідэнта Мазамбіка ў Мінску або наведаць сталіцу Мапуту з афіцыйным візітам для “прадметных перамоваў па ўсім комплексе пытанняў двухбаковага і міжнароднага парадку дня”.

Дыпламатычныя адносіны паміж дзяржавамі ўстаноўлены 29 лютага 2000 года.