Падчас рэйду ў Брэсце затрымлівалі толькі жанчын — усяго каля 70

25 студзеня, Позірк. Падчас масавага рэйду сілавікоў у Брэсце 23 студзеня было затрымана каля 70 чалавек, усе — жанчыны, паведаміў праваабарончы цэнтр “Вясна”.

Паводле інфармацыі праваабаронцаў, затрыманых дастаўлялі на допыты ў КДБ, Следчы камітэт і РАУС Ленінскага раёна. Са спасылкай на відавочцаў, паведамляецца, што “людзей было так шмат, што яны сядзелі ў калідорах, пры гэтым тых, хто выказваў незадаволенасць, адпраўлялі ў ІЧУ на 72 гадзіны”.

23 студзеня па ўсёй краіне пракацілася хваля ператрусаў і затрыманняў сваякоў палітычных зняволеных, былых палітвязняў і інш. Некаторыя з затрыманняў звязаныя з праектам харчовай дапамогі рэпрэсаваным INeedHelp, які 16 студзеня быў прызнаны “экстрэмісцкім фарміраваннем”.

Сярод іншых была затрыманая і на наступны дзень арыштаваная на 15 сутак Марына Адамовіч — жонка прызнанага палітвязнем апазіцыйнага лідара Мікалая Статкевіча, які асуджаны на 14 гадоў зняволення ва ўмовах асаблівага рэжыму ў рамках “справы Ціханоўскага”.

25 студзеня сузаснавальнік фонду салідарнасці BySol Андрэй Стрыжак паведаміў у сваім тэлеграм-канале, што “падчас аблавы з 23 студзеня па сённяшні дзень” выяўлена не менш за 143 “фактаў затрыманняў”.

Паводле абноўленых звестак праваабаронцаў, усяго пераследу падвергнулася не менш за 159 чалавек.