Суд ЕС пакінуў у сіле санкцыі супраць “Белавія”

29 траўня, Позірк. Еўрапейскі суд агульнай юрысдыкцыі 29 траўня пакінуў у сіле санкцыі Еўрасаюза, уведзеныя супраць “Белавія”, адхіліўшы адпаведны іск беларускай авіякампаніі, вынікае з інфармацыі, размешчанай на сайце суда.

Суд адзначыў, што заяўнік з’яўляецца “дзяржаўнай нацыянальнай авіякампаніяй-перавозчыкам”. Згадана, што Аляксандр Лукашэнка паабяцаў “Белавія” разнастайную падтрымку пасля таго, як ЕС закрыў сваё неба і аэрапорты для беларускіх авіяперавозчыкаў; дамовіўся з прэзідэнтам РФ Уладзімірам Пуціным “пра планаванне адкрыцця новых авіямаршрутаў”.

У паведамленні суда гаворыцца, што “кіраўніцтва заяўніка таксама раіла сваім супрацоўнікам не пратэставаць супраць парушэнняў на выбарах і масавых затрыманняў у Беларусі, улічваючы той факт, што “Белавія” з’яўляецца дзяржаўным прадпрыемствам”.

На падставе гэтага суд прыйшоў да высновы, што “заяўнік атрымлівае выгаду ад рэжыму Лукашэнкі і падтрымлівае яго”.

Адзначаецца, што кампанія “Белавія” ўдзельнічала ў “дастаўцы мігрантаў” з краін Блізкага Усходу, якія жадаюць трапіць у ЕС, у прыватнасці адкрыла новыя авіямаршруты і павялічыла колькасць рэйсаў на існых. Мясцовыя тураператары “выступалі пасярэднікамі пры продажы квіткоў заяўніка патэнцыйным мігрантам”. Такім чынам, лічыць суд, авіяперавозчык “садзейнічае дзейнасці рэжыму Лукашэнкі”, якая, у сваю чаргу “садзейнічае незаконнаму перасячэнню знешніх межаў саюза”.

Суд палічыў непераканаўчымі прыведзеныя беларускім авіяперавозчыкам контраргументы і пакінуў у сіле санкцыі супраць кампаніі “Белавія”, абавязаўшы яе аплаціць адпаведныя судовыя выдаткі.

Генеральны дырэктар авіякампаніі “Белавія” Ігар Чаргінец 11 сакавіка ў эфіры праекта “Минск — Москва | Прямой эфир” (“Мінск — Масква | Жывы эфір”) заявіў, што большасць заходніх авіякампаній не могуць адкрыта папрасіць аднавіць авіязносіны з Расіяй і Беларуссю, кіраўніцтва Міжнароднай асацыяцыі паветранага транспарту (IATA) таксама толькі ў кулуарах крытыкуе абмежаванні, праз якія церпіць авіяцыйны бізнес і пасажыры.

23 траўня 2021 года ў выніку дзеянняў беларускіх уладаў у мінскім аэрапорце здзейсніў вымушаную пасадку самалёт ірландскай авіякампаніі Ryanair, які ляцеў з Афін у Вільнюс. На борце былі на той момант апазіцыйны блогер Раман Пратасевіч і яго сяброўка, расіянка Сафія Сапега. Яны былі затрыманыя, асуджаныя, але пасля памілаваныя.

Пасля інцыдэнту беларускай нацыянальнай авіякампаніі “Белавія” забаронена лятаць у краіны Еўрасаюза. 2 снежня 2021 года Вялікабрытанія, Канада, ЗША і ЕС скаардынавана ўхвалілі чарговыя санкцыі ў дачыненні да шэрагу беларускіх фізічных асоб і арганізацый. Як было адзначана ў сумеснай заяве з гэтай нагоды, санкцыйныя меры прынятыя “ў адказ на працяглыя напады на правы чалавека і асноўныя свабоды ў Беларусі, ігнараванне міжнародных норм і неаднаразовыя акты рэпрэсій”. Сярод арганізацый, якія трапілі ў “чорны спіс”, значылася і “Белавія”.

2 сакавіка 2022 года, неўзабаве пасля поўнамаштабнага расійскага ваеннага ўварвання ва Украіну, ЗША ўвялі ў дачыненні да “Белавія” абмежаванні, якія тычацца экспарту прадукцыі авіяцыйнай сферы і ліцэнзавання пэўных самалётаў і запчастак. З 7 снежня 2023 года яны былі працягнутыя яшчэ на 180 дзён.

9 жніўня 2023 года “Белавія” была ўключана ў санкцыйныя спісы ЗША.

3 лістапада 2023 года Чаргінец на прэс-канферэнцыі ў Мінску прызнаў, што планы па мадэрнізацыі флота самалётаў авіякампаніі “Белавія” былі парушаны праз увядзеныя заходнія санкцыі.