Вайскоўцы ССА пачалі сумесныя вучэнні ў Казахстане — Мінабароны

14 ліпеня, Позірк. Вайскоўцы Сіл спецыяльных аперацый (ССА) УС Беларусі пачалі ў Казахстане сумесныя міжнародныя тактыка-спецыяльныя вучэнні “Вяршыня братэрства — 2024”, паведамляе прэс-служба Міністэрства абароны.

Адкрыццё вучэнняў адбылося на пляцы 37-й дэсантна-штурмавой брыгады ССА Узброеных сіл Казахстана, адзначае ведамства.

“Найбліжэйшым часам вайскоўцы, якія ўдзельнічаюць у вучэнні, зробяць 300-кіламетровы марш на палігон, дзе будуць выконваць вучэбна-баявыя задачы”, — гаворыцца ў паведамленні.

ДзяржСМІ паведамляюць, што асноўны этап вучэнняў пройдзе на вайсковым палігоне “Тактал” у “адным з рэгіёнаў Казахстана”, з беларускага боку ў іх бяруць удзел “больш за 50 вайскоўцаў ССА”.

Заяўляецца, што “беларускі армейскі спецназ пройдзе поўны курс баявой падрыхтоўкі ў горна-пустыннай мясцовасці Казахстана”.

На сайце Мінабароны Казахстана няма інфармацыі аб пачатку вучэнняў.

У аглядзе асноўных падзей 8–14 ліпеня ў ютуб-канале казахстанскага абароннага ведамства адсутнічае згадка пра “Вяршыню братэрства — 2024”. Асноўная ўвага там нададзеная вучэнням “Бірлестік — 2024”, якія праходзяць у Мангістаўскай вобласці з удзелам вайскоўцаў Казахстана, Азербайджана, Кыргызстана, Таджыкістана і Узбекістана.

У тэлеграм-канале беларускага абароннага ведамства твары ўдзельнікаў вучэнняў заблюраныя.

У 2020 годзе ССА ўдзельнічалі ў падаўленні масавых пратэстаў, уключаючы выкарыстанне зброі. Ад рук байцоў падраздзяленняў у Мінску загінуў пратэстовец Аляксандр Тарайкоўскі, у Брэсце — Генадзь Шутаў.

Вайскоўцы Казахстана 3 ліпеня ў Мінску бралі ўдзел у парадзе з нагоды Дня незалежнасці. Акрамя іх, маршам прайшлі воінскія падраздзяленні Беларусі, Азербайджана, Кітая, Кыргызстана, Расіі, Узбекістана, Таджыкістана.