У Мінскай і Гродзенскай абласцях адпрацоўваюць барацьбу з незаконнымі ўзброенымі фарміраваннямі

7 жніўня, Позірк. “Пытанні барацьбы з дыверсійна-разведвальнымі групамі (ДРГ) праціўніка і незаконнымі ўзброенымі фарміраваннямі (НУФ)” адпрацоўваюцца з 7 па 8 жніўня падчас камандна-штабных вучэнняў Паўночна-заходняга аператыўнага камандавання (ПЗАК), паведаміла Мінабароны.

У якасці мэты вучэнняў заяўлена “ўдасканаленне ўзроўню гатоўнасці і здольнасці органа ваеннага кіравання, злучэнняў і воінскіх часцей аператыўнага аб’яднання ў забеспячэнні бесперапыннага кіравання падпарадкаванымі сіламі і сродкамі падчас вядзення баявых дзеянняў”. Яно пройдзе на палігонах і ўчастках мясцовасці на тэрыторыі Мінскай і Гродзенскай абласцей.

Апроч барацьбы з ДРГ і НУФ будуць адпрацаваны “пытанні забеспячэння ўстойлівасці сістэмы кіравання войскамі, а таксама павышэнне жывучасці пунктаў кіравання; планавання і прымянення беспілотных авіяцыйных комплексаў для вядзення разведкі, цэлеўказання, а таксама комплексаў узбраення з авіяцыйнымі баражуючымі боепрыпасамі; удасканалення сістэмы агнявога паражэння праціўніка ракетнымі войскамі і артылерыяй”.

У ваенным ведамстве асобна адзначылі, што “колькасць удзельнікаў вучэння, а таксама колькасць асноўных сістэм узбраення не перавышае параметры, вызначаныя Венскім дакументам 2011 года, якія падлягаюць апавяшчэнню”.

Кіруе манеўрамі камандуючы войскамі ПЗАК генерал-маёр Аляксандр Бас, які быў прызначаны на пасаду 17 ліпеня.

29–30 ліпеня праводзіліся тактыка-спецыяльныя вучэнні разведчыкаў Заходняга аператыўнага камандавання “з улікам вопыту спецыяльнай ваеннай аперацыі” Узброеных сіл РФ ва Украіне.

Тэрмінам “спецыяльная ваенная аперацыя (СВА)” расійскія і беларускія ўлады называюць поўнамаштабную вайну, якая вядзе РФ супраць Украіны пры падтрымцы афіцыйнага Мінска з 24 лютага 2022 года.

З 2023 года “досвед СВА” рэгулярна фігуруе ў рэлізах сілавых ведамстваў аб правядзенні ў Беларусі розных вучэнняў.