Беларуская місія амерыканскага агенцтва USAID адкрыла офіс у Вільнюсе
20 верасня, Позірк. Місія Агенцтва ЗША па міжнародным развіцці (USAID) у Беларусі адкрыла 20 верасня офіс у Вільнюсе (Літва).
Як паведамляе прэс-служба USAID, на цырымоніі адкрыцця памочнік адміністратара агенцтва Эрын Элізабэт МакКі заявіла аб далейшай падтрымцы місіяй дэмакратычных памкненняў беларусаў.
Паводле яе слоў, падтрымка USAID Беларусі пачалася ў 1999 годзе і працягваецца дагэтуль: агенцтва “супрацоўнічала з беларускім народам у цяжкія хвіліны, у тым ліку ў барацьбе з наступствамі Чарнобыля, пандэміяй COVID-19 і палітычным крызісам 2020 года, а таксама спрыяла такім поспехам, як бум беларускіх стартапаў і IT-сферы”.
Нягледзячы на закрыццё ў 2021 годзе офіса USAID у Мінску, сказала МакКі, “пакуль беларускія грамадзяне застаюцца адданыя дэмакратыі”, урад ЗША працягне “паслядоўна падтрымліваць дэмакратычнае развіццё Беларусі і імкненне да больш адкрытага грамадства”. Яно будзе і далей прасоўваць “дэмакратычныя прынцыпы і правы чалавека, аказваць падтрымку незалежным СМІ і грамадзянскай супольнасці”.
“Амерыканскі народ падтрымлівае беларусаў у іх намаганнях па стварэнні прадстаўнічага ўрада, [у адстойванні] права на сходы і выказванне меркаванняў, свабоды выбару, эканамічных магчымасцяў і доступу да разнастайнасці ідэй”, — заявіў на цырымоніі часовы павераны ў справах ЗША ў Беларусі Пітэр Каўфман.
Амбасадар ЗША ў Літве Кара Макдональд падкрэсліла даўняе партнёрства паміж Вільнюсам і Вашынгтонам і падзякавала літоўскаму ўраду і народу гэтай краіны за “пастаянную падтрымку грамадзян Беларусі і Украіны ў іх барацьбе за суверэнітэт і свабоду”.
20 верасня дэмакратычны лідар Святлана Ціханоўская прыняла МакКі ў Вільнюсе і падзякавала USAID і амерыканскаму ўраду за “доўгатэрміновую падтрымку Беларусі і беларускай грамадзянскай супольнасці”, за падтрымку стратэгічнага дыялогу паміж Беларуссю і ЗША, а таксама за прасоўванне беларускага пытання на міжнароднай арэне. Пра гэта паведаміў “Позірку“ галоўны дарадца Ціханоўскай Франак Вячорка.
Падчас сустрэчы бакі абмеркавалі падтрымку ЗША незалежных беларускіх СМІ, праваабаронцаў, культурных праектаў, сумленнага бізнесу і адукацыйных праграм. Ціханоўская адзначыла важнасць дапамогі ўсім арганізацыям, якія былі высланыя ў выніку рэпрэсій, і тым, хто працягвае сваю працу ўнутры краіны.
Ціханоўская паведаміла МакКі пра запуск Міжнароднага гуманітарнага фонду для падтрымкі ахвяр рэпрэсій у Беларусі і выказала надзею, што ЗША таксама далучацца да працы фонду.