Беларускіх біятланістаў не дапусцяць да выступленняў у новым сезоне
29 верасня, Позірк. Біятланісты з Расіі і Беларусі не змогуць выступіць у новым міжнародным сезоне, паведамляе ТАСС са спасылкай на Міжнародны саюз біятланістаў (IBU).
У сербскім Бялградзе гэтымі днямі засядае кангрэс IBU. У арганізацыі адзначылі, што пытанне аднаўлення членства нацыянальных федэрацый дзвюх краін і допуску іх спартсменаў да спаборніцтваў не было ўключана ў парадак дня.
“Рашэнне кангрэса ад 2022 года застанецца ў сіле. Гэта азначае, што расейскія спартоўцы не будуць удзельнічаць у спаборніцтвах. У правілах IBU няма палажэння аб удзеле спартсменаў у нейтральным статусе”, — удакладнілі ў саюзе.
Аб тым, што беларускія і расійскія лыжнікі не будуць дапушчаны да Кубка свету ў новым сезоне, паведамлялася напярэдадні.
28 лютага 2022 года, праз некалькі дзён пасля пачатку вайны ва Ўкраіне, Міжнародны алімпійскі камітэт заклікаў спартовыя федэрацыі не дапушчаць да спаборніцтваў пад сваёй эгідай атлетаў з РФ і Беларусі. Гэтая рэкамендацыя была неадкладна і масава прынята да выканання, у выніку чаго расійскі і беларускі спорт аказаўся амаль у поўнай ізаляцыі.
25 студзеня 2023 года выканкам МАК пацвердзіў санкцыі, уведзеныя ў дачыненні да Беларусі і РФ з-за вайны супраць Украіны, аднак зазначыў, што ніводнаму спартсмену нельга забараняць удзельнічаць у спаборніцтвах “толькі з-за яго пашпарта”.
28 сакавіка МАК выпусціў заяву, у якой рэкамендаваў міжнародным федэрацыям па відах спорту дазволіць беларусам і расіянам удзельнічаць у міжнародных спаборніцтвах. Пры гэтым павінен быць выкананы шэраг умоў. Беларускія і расійскія атлеты могуць спаборнічаць “у якасці індывідуальных нейтральных спартсменаў” (без выкарыстання сцяга, гімна і іншай сімволікі сваіх дзяржаў) і толькі ў тым выпадку, калі яны “актыўна не займаліся падтрымкай баявых дзеянняў” і не маюць дзейных кантрактаў з сілавымі і ваеннымі ведамствамі сваіх краін.
З аналагічнымі ўмовамі МАК дапусціў індывідуальных спартсменаў з Беларусі і Расіі да ўдзелу ў летніх Алімпійскіх гульнях-2024 у нейтральным статусе.
