У 2024 годзе ў Расіі затрыманыя 964 чалавекі, якіх адшуквалі беларускія ўлады — Кубракоў

23 траўня, Позірк. У 2024 годзе ў Расіі затрыманыя 964 чалавекі, якіх адшуквалі ў Беларусі за ўчыненне злачынстваў, паведаміў кіраўнік Міністэрства ўнутраных спраў Іван Кубракоў 23 траўня на сумеснай калегіі ведамстваў дзвюх краін.

Паводле яго слоў, якія перадае прэс-служба МУС, у Беларусі затрымана 185 чалавек, абвешчаных у вышук РФ.

Кубракоў таксама паведаміў, што “ў рамках процідзеяння тэрарызму і экстрэмізму” і “ў выніку агульных намаганняў” у 2023–2024 гадах папярэджаныя “чатыры тэракты ў дачыненні да службовых асоб і аб’ектаў крытычнай інфраструктуры Беларусі і Расіі”.

Падраздзяленнямі па наркакантролі МУС дзвюх дзяржаў у ходзе аналізу звестак аб крыптавалютных аперацыях атрыманая інфармацыя ў дачыненні да “35 асоб, якія маюць дачыненне да незаконнага абароту наркотыкаў у Беларусі, якія ў выніку прыцягнутыя да крымінальнай адказнасці”, дадаў кіраўнік МУС. У гэты ж перыяд у Расіі, паводле яго слоў, затрымана “сямёра закладчыкаў”, у іх канфіскавана больш за 50 кг псіхатропаў, частка з якіх прызначалася для перапраўкі ў Беларусь.

“Сумеснымі намаганнямі суправоджана 10 міжнародных кантраляваных паставак забароненых рэчываў, па сямі — затрыманыя арганізатары і актыўныя ўдзельнікі наркатрафіку”, — адзначыў Кубракоў.

Кіраўнік МУС РФ Уладзімір Калакольцаў паведаміў, што “сумарна за 2024 год і першы квартал бягучага колькасць супрацьпраўных дзеянняў у дачыненні да расіян у Беларусі скарацілася на 10%”. “У Расіі колькасць злачынстваў, дзе пацярпелымі сталі беларусы, за аналагічны перыяд зменшылася амаль на 2%”, — сказаў ён.

9 красавіка стала вядома, што па запыце беларускіх уладаў у базу вышуку МУС Расіі за пяць месяцаў было ўключана больш за 1.200 грамадзян і ўраджэнцаў Беларусі, 58 з якіх былі асуджаныя ў Беларусі па палітычна матываваных крымінальных справах.

Усяго, паводле даных “Медыязоны”, у базе вышуку па стане на пачатак красавіка знаходзілася больш за 4.700 беларусаў.

13 лютага 2024 года паведамлялася, што ў базе вышуку МУС РФ фігуруюць імёны 3.186 грамадзян і ўраджэнцаў Беларусі, да траўня ў базу дадалі яшчэ больш за 400 грамадзян Беларусі.

У лістападзе таго ж года база папоўнілася імёнамі 773 грамадзян Беларусі.