Нобелеўскі камітэт занепакоены сітуацыяй у Беларусі — НАУ

19 чэрвеня, Позірк. Нобелеўскі камітэт “з вялікай занепакоенасцю” сочыць за сітуацыяй з лаўрэатам Нобелеўскай прэміі міру Алесем Бяляцкім і іншымі палітвязнямі ў Беларусі, гаворыцца ў лісце ў адказ дырэктара Нарвежскага Нобелеўскага інстытута Крысціяна Берга Харпвікена на адрас кіраўніка Народнага антыкрызіснага ўпраўлення Паўла Латушкі.

Інфармацыю пра гэта “Позірку” надала прэс-служба НАУ.

Латушка ў лісце Харпвікену адзначыў: “Ваш важкі голас, узмоцнены велізарным маральным аўтарытэтам Нобелеўскага камітэта, мог бы істотна павысіць міжнародную дасведчанасць аб катастрафічнай сітуацыі з правамі чалавека і рэпрэсіях у Беларусі, якія працягваюцца”.

Кіраўнік НАУ звярнуўся з просьбай разгледзець магчымасць больш шырокай і паслядоўнай публічнай падтрымкі вызвалення лаўрэата Нобелеўскай прэміі міру і кіраўніка праваабарончага цэнтра “Вясна“ Алеся Бяляцкага, а таксама ўсіх палітычных зняволеных у краіне.

“Нобелеўская прэмія міру прыцягнула такую неабходную ўвагу сусветнай грамадскасці да лёсу Алеся Бяляцкага і да больш шырокай барацьбы за правы чалавека ў Беларусі. Аднак сітуацыя застаецца крытычнай, а ўвага міжнароднай супольнасці з часам слабее“, — адзначыў Латушка.

У адказе Нарвежскі нобелеўскі камітэт адзначыў, што просьба “будзе перададзеная для звароту ўвагі камітэта падчас наступнага пасяджэння“.

“І хоць Нобелеўскі камітэт адзначыў, што вельмі рэдка выказвае сваё меркаванне, але ў тых нешматлікіх выпадках, калі гэта адбываецца, увага засяроджана на сітуацыі лаўрэата Нобелеўскай прэміі міру Алеся Бяляцкага“, — паведаміла прэс-служба НАУ.

Нобелеўская прэмія міру штогод прысуджаецца Нобелеўскім камітэтам у Осла фізічным асобам і арганізацыям, якія, на думку камітэта, зрабілі выбітны ўнёсак у справу ўмацавання міру.

У 2022 годзе прэмія была прысуджана кіраўніку беларускага праваабарончага цэнтра “Вясна“, палітвязню Алесю Бяляцкаму, расійскай арганізацыі “Мемарыял“ і ўкраінскаму Цэнтру грамадзянскіх свабод.

Бяляцкі, яго намеснік і віцэ-прэзідэнт Міжнароднай федэрацыі за правы чалавека (FIDH) Валянцін Стэфановіч і каардынатар кампаніі “Праваабаронцы за свабодныя выбары” Уладзімір Лабковіч 3 сакавіка 2023 года былі асуджаныя ў рамках палітычна матываванай справы на 10, 9 і 7 гадоў пазбаўлення волі адпаведна.

30 студзеня стала вядома, што на Нобелеўскую прэмію міру быў намінаваны беларускі палітык, палітвязень Мікалай Статкевіч. Адпаведная прапанова была высунутая дэпутатам Еўрапейскага парламента ад Літвы Пятрасам Аўштравічусам.