Ціханоўская на палях саміту НАТО: Толькі беларусы ўтрымліваюць Лукашэнку ад паўнавартаснага ўступлення ў вайну

24 чэрвеня, Позірк. Толькі беларускі народ утрымлівае Аляксандра Лукашэнку ад паўнавартаснага ўступлення ў вайну супраць Украіны на баку Расіі, заявіла 24 чэрвеня ў Гаазе дэмакратычны лідар Святлана Ціханоўская.

Галоўны дарадца палітыка Франак Вячорка паведаміў “Позірку”, што з такім пасылам яна выступіла на панэлі дыскусійнага хаба NATO in the Huis на палях саміту Паўночнаатлантычнага альянсу.

“Толькі 4% [жыхароў Беларусі] падтрымлівае адпраўку беларускага войска на вайну, — сказала Ціханоўская. — Больш за 60% выступае супраць размяшчэння ядзернай зброі ў Беларусі. І нягледзячы на ​​пастаянную антызаходнюю прапаганду, толькі 29% успрымае НАТО як пагрозу”.

Гэтыя лічбы, паводле слоў дэмлідара, паказваюць, што беларусы — “не расіяне”, яны “адпрэчваюць вайну” і “значна бліжэй да Еўропы, чым прынята думаць”. Менавіта таму, падкрэсліла спікер, “трэба адрозніваць беларусаў і рэжым”. Падтрымка беларускага грамадства, адзначыла яна, таксама з’яўляецца “інвестыцыяй у еўрапейскую бяспеку”, паколькі “вайсковая моц мала што значыць без людзей, гатовых абараняць свае каштоўнасці”.

Ціханоўская нагадала, што сёлета ўвосень Лукашэнка і прэзідэнт РФ Уладзімір Пуцін плануюць правесці ў Беларусі вайсковыя вучэнні “Захад-2025”.

“Гэта яшчэ адна правакацыя супраць суседзяў, яшчэ адзін інструмент шантажу, — перакананая палітык. — Так, афіцыйна яны паабяцалі трымаць вучэнні падалей ад межаў НАТО. Але ці можна верыць гэтаму рэжыму? У 2022 годзе Лукашэнка таксама абяцаў, што расійскія войскі вернуцца дадому”.

“Мы павінны пільна сачыць за гэтымі вучэннямі — і за ўсім, што адбываецца ў Беларусі. Расія разглядае Беларусь як вайсковы фарпост і працягвае нарошчваць там сваю прысутнасць”, — канстатавала яна.

У Беларусі, паводле слоў Ціханоўскай, “адбываецца паўзучая акупацыя”, рэжым Лукашэнкі “перайшоў ад аўтарытарызму да таталітарызму — пад маркай вайны і выдуманых унутраных ворагаў”.

“Русіфікацыя, прапаганда, размяшчэнне ядзернай зброі, рэпрэсіі. Палітвязні выкарыстоўваюцца як разменная манета. Многія з іх зазнаюць катаванні і знаходзяцца ў поўнай ізаляцыі — як і мой муж Сяргей да мінулай суботы, — абмалявала палітык сітуацыю ў краіне. — Вайна стала падарункам для Лукашэнкі. Сама меней 287 дзяржпрадпрыемстваў пастаўляюць прадукцыю для расійскага войска. Рэжым надае тэрыторыю і інфраструктуру для расійскіх дронаў у абмен на падтрымку Пуціна. Ён — галоўнае шчыліна ў санкцыях супраць Расіі”.

Лукашэнку “нельга давяраць”, паколькі яго “хвалюе толькі асабістая ўлада”, папярэдзіла дэмлідар. Паводле яе слоў, Лукашэнка гуляе з Захадам, каб “дамагчыся зняцця санкцый і вярнуцца да нармальных стасункаў”. Аднак ён “не можа змяніць ні сваё агрэсіўнае мысленне, ані сваю антыбеларускую палітыку” і проста “выпрабоўвае Захад на еднасць і паслядоўнасць”.

Палітык паведаміла, што яна і яе каманда сёння прадстаўляюць “ўсебаковы даклад” пад назвай Red Paper, які паказвае, “наколькі глыбока бяспека Беларусі і ЕС узаемазвязаныя”.

“Ён ахоплівае ключавыя аспекты бяспекі, уключаючы традыцыйныя ваенныя пагрозы, міграцыю, энергетычную і эканамічную ўстойлівасць, інфармацыйную вайну, сацыяльна-дэмаграфічныя выклікі і нават бяспеку моладзі, — сказала Ціханоўская. — Даклад аб’ядноўвае меркаванні вядучых экспертаў і ўтрымлівае мноства практычных рэкамендацый.

Ён тлумачыць, як супрацьстаяць пагрозам, якія паходзяць з Беларусі, і падкрэслівае, наколькі Беларусь важная для доўгатэрміновай бяспекі ЕС”.

У будучыні Беларусь, паводле яе слоў, можа “істотна ўзмацніць стабільнасць Еўропы”, дэмакратычнае пераўтварэнне краіны і яе інтэграцыя ў ЕС “прынясуць узаемную выгаду”.

“Мы павінны глядзець на Беларусь не толькі праз прызму правоў чалавека, але і праз прызму еўрапейскай бяспекі. Стабільная, дэмакратычная Беларусь — неабходны элемент архітэктуры бяспекі ў рэгіёне. Беларусь — частка цяперашняга крызісу. Але яна таксама можа стаць часткай рашэння”, — падкрэсліла спікер.

Адзначыўшы, што “дыктатуры здаюцца непарушнымі, пакуль раптоўна не разбураюцца”, Ціханоўская заклікала “быць гатовымі да перамен і захоўваць надзею людзей”.

“Важна падтрымліваць “разумную сілу” Захаду, каб супрацьстаяць так званаму “рускаму свету”, — заявіла яна. — Заваёва сэрцаў і розумаў людзей можа пазбавіць нас ад каласальных выдаткаў на абарону. Аніводная зброя не абараняе дэмакратыю лепш, чым людзі, якія ў яе вераць. Мы не павінны аслабляць міжнародны ціск на рэжым — да таго часу, пакуль не адбудуцца рэальныя змены: пакуль не спыняцца рэпрэсіі і не будуць вызваленыя палітвязні”.

“Да тае пары я прашу вас цвёрда стаяць побач з беларусамі, якія працягваюць барацьбу за свабоду. Таму што сёння Беларусь — гэта меч, завостраны з двух бакоў. У правільных руках — руках беларускага народа і дэмакратыі — ён можа стаць сілай міру. У няправільных — у руках дыктатараў — ён становіцца прыладай агрэсіі і пагрозай для суседзяў”.

Паводле слоў Ціханоўскай, трэба разам “вырваць Беларусь з-пад кантролю Пуціна і падтрымаць яе шлях да незалежнай, дэмакратычнай і мірнай еўрапейскай будучыні”, таму што гэта “агульная адказнасць” і “агульная цікавасць”.

Палітык падкрэсліла, што вяртанне яе мужа Сяргея Ціханоўскага натхніла беларускі дэмакратычны рух.

“Ён не проста выжыў — ён голас праўды, крыніца мужнасці. Яго вызваленне набліжае нас да перамен у Беларусі, — перакананая яна. — Вядома, лёс Беларусі залежыць ад падзей ва Украіне — і наадварот. Нашыя лёсы пераплеценыя. Мы маем агульнага ворага — “рускі свет”. Ён спрабуе падняволіць Украіну ракетамі і бомбамі”.

Ціханоўскі, нагадала дэмлідар, заклікаў беларусаў “працягваць барацьбу за свабоду”, “выказаў поўную падтрымку Украіне і прэзідэнту Зяленскаму, якога назваў сапраўдным героем”, а таксама “назваў пуцінскую Расію тым, чым яна з’яўляецца насамрэч — найвялікшай пагрозай і цэнтрам зла”.