Укараненне ШІ ў сістэмы бяспекі сталічнага аэрапорта і мытні абмяркоўваецца з кітайскай кампаніяй
27 жніўня, Позірк. Укараненне штучнага інтэлекту (ШІ) ў сістэмы бяспекі абмеркавалі кіраўнік нацыянальнага аэрапорта Мінск Уладзімір Чараухін і памочнік прэзідэнта Nuctech Company Limited, генеральны дырэктар рэгіянальнага цэнтра па Азіі і СНД Ян Бо, паведаміла 27 жніўня прэс-служба беларускага авіятранспартнага вузла.
Адзначаецца, што гаворка ішла пра перспектывы прымянення тэхналогій ШІ ў працы надгляднага абсталявання і ўкараненне “перадавых распрацовак кітайскай кампаніі ў галіне забеспячэння авіяцыйнай бяспекі”. Таксама былі разгледжаныя “наяўныя пытанні партнёрства, уключаючы ход выканання раней дасягнутых дамоўленасцей”.
“Бяспека пасажыраў — наш галоўны прыярытэт. Укараненне штучнага інтэлекту і найноўшых тэхналогій Nuctech у працу надглядных працэсаў і навучанне персаналу на сучасных трэнажорах дазваляе нам выводзіць стандарты бяспекі на якасна новы ўзровень, які адпавядае найлепшым сусветным практыкам”, — заявіў Чараухін.
У нацыянальным аэрапорце працуе два комплексы надгляднага абсталявання, пастаўленыя Nuctech у 2024 годзе, адзначаецца ў паведамленні.
26 жніўня магчымасці прымянення ШІ пры аналізе сканаграм і іх цэнтралізаванага захоўвання для правядзення паўторнага аўтаматызаванага аналізу Ян Бо абмеркаваў са старшынёй Дзяржаўнага мытнага камітэта (ДМК) Уладзімірам Арлоўскім, паведаміла прэс-служба ДМК.
Ян Бо выказаў высокую зацікаўленасць у “маштабаванні сумесных праектаў” і гатоўнасць “укараняць тэхналагічныя рашэнні, адаптаваныя пад спецыфіку працы беларускай мытні”.
Nuctech Company Limited супрацоўнічае з ДМК ужо шмат гадоў. Ужо ў 2018 годзе мытня выкарыстоўвала два інспекцыйна-надглядныя комплексы, вырабленыя Nuctech (стацыянарны і чыгуначны). СМІ паведамлялі, што з іх дапамогай у тым годзе беларускія мытнікі выявілі каля 1,5 тыс. адміністрацыйных правапарушэнняў, сума канфіскаваных тавараў склала больш за 8 млн долараў.
На 2019 год у Нацыянальным аэрапорце Мінск функцыянаваў выраблены Nuctech настольны дэтэктар выяўлення слядоў наркатычных і выбуховых рэчываў.
У траўні таго года СМІ паведамлялі, што Фонд мытнага кантролю папоўніўся 49 тэхнічнымі сродкамі, у тым ліку мабільным інспекцыйна-надглядным комплексам (ІНК), дзевяццю сістэмамі інспекцыі багажу з функцыяй аўтаматычнага вызначэння наркатычных і выбуховых рэчываў, 33 пераноснымі і шасцю настольнымі дэтэктарамі выяўлення слядоў наркатычных і выбуховых рэчываў. Уся тэхніка была выраблена Nuctech.
Адметна, што тады гаворка ішла пра пастаўку абсталявання беларускай мытні ў рамках тэхніка-эканамічнай дапамогі ад урада Кітая.
Nuctech Company Limited з’яўляецца буйным кітайскім вытворцам сістэм бяспекі і надгляднага абсталявання. Кампанія заснавана ў 1997 годзе пры ўніверсітэце Цынхуа. Спецыялізуецца на выпуску буйнагабарытных інспекцыйна-надглядных комплексаў для сканавання кантэйнераў і аўтамабіляў, рэнтгенаўскіх установак для надгляду багажу, а таксама сістэм выяўлення небяспечных рэчываў і сканераў для праверкі людзей. Прадукцыя пастаўляецца ў многія краіны — для аснашчэння межаў, мытных пунктаў, аэрапортаў і партоў.
