З пачатку года выдадзена больш за 15 тыс. “карт паляка”, правілы іх атрымання стануць больш жорсткімі

18 снежня, Позірк. Аб статыстыцы выдачы “карт паляка” ў кантэксце анансаванага ўзмацнення жорсткасці правілаў іх прадастаўлення паведамляе выданне Rzeczpospolita.

Адзначаецца, што сёлета больш за 9,2 тыс. “карт паляка” было выдадзена ў консульствах, яшчэ 3,5 тыс. — у Падляскім ваяводстве, 1,4 тыс. — у Люблінскім ваяводстве. У агульнай складанасці выдадзена больш за 15 тыс. карт.

Паводле даных Цэнтральнага рэестра выдадзеных і ануляваных “карт паляка”, які вядзе Міністэрства замежных спраў, больш за 206 тыс. замежнікаў ужо атрымалі “карту паляка” (перыяд часу не ўказаны. — “Позірк”.).

Са спасылкай на інфармацыю МЗС Польшчы, медыя паведамляе, што з пачатку дзеяння закона аб выдачы “карт паляка” (прыняты ў верасні 2007 года) і да 15 кастрычніка 2024 года анулявана 1.830 такіх дакументаў.

Удакладняецца, што ў чатырох чалавек статус ануляваны за “паводзіны, якія дыскрэдытуюць Польшчу ці палякаў”, у 157 — за выкарыстанне фальшывых дакументаў або “з прычын бяспекі, дзеянняў на шкоду суверэнітэту Польшчы або ўдзелу ў парушэннях правоў чалавека”, яшчэ 145 замежнікаў адмовіліся ад карты, а ў 1.524 выпадках была выдадзена новая “карта паляка” са змененымі звесткамі.

Акрамя гэтага, 7.310 карт ануляваныя ў сувязі атрыманнем іх уладальнікамі польскага грамадзянства або дазволу на пастаяннае пражыванне.

Раней узмацненне жорсткасці правілаў атрымання “карты паляка” анансавалася ў рамках новай міграцыйнай стратэгіі Варшавы, прапанаванай прэм’ер-міністрам Дональдам Тускам.

Да прыняцця гэтага дакумента “карту паляка” можна было атрымаць не толькі замежнікам польскага паходжання, але і людзям, якія актыўна ўдзельнічаюць “у дзейнасці на карысць польскай мовы і культуры або польскай нацыянальнай меншасці на працягу як мінімум апошніх трох гадоў”, канстатуе выданне. Урад Туска прапануе гэтую меру з закона выключыць.

Пры гэтым у публікацыі гаворыцца, што ў МЗС Польшчы паступаюць сігналы аб “падробцы дакументаў супрацоўнікамі архіваў або судоў, якія выдаюць дакументы, што пацвярджаюць нібыта польскае паходжанне замежніка”.

У матэрыяле не прыводзяцца лічбы аб грамадзянах Беларусі, якія маюць “карту паляка”.

18 студзеня ў эфіры праграмы “Маркаў. Нічога асабістага” на тэлеканале АНТ начальнік Дэпартамента грамадзянства і міграцыі МУС Аляксей Бягун заявіў, што ў Беларусі праводзіцца “комплекс мерапрыемстваў”, каб “пераканаць грамадзян, што “карта паляка” наносіць шкоду, у тым ліку нацыянальнай бяспецы Беларусі, і выкарыстоўваць яе на тэрыторыі Беларусі, і атрымліваць “карту паляка” недапушчальна”.

Паводле яго сцвярджэння, “толькі за паўгода мінулага” зафіксавана “больш за 100 выпадкаў, калі грамадзяне публічна звярнуліся” да МУС, “каб адмовіцца ад “карты паляка”.