Рыжанкоў дамовіўся з кіраўніком МЗС РФ Лаўровым заставацца ў “сталым працоўным кантакце”

25 студзеня, Позірк. Міністр замежных спраў Беларусі Максім Рыжанкоў 25 студзеня абмеркаваў па тэлефоне са сваім расійскім калегам Сяргеем Лаўровым “пытанні двухбаковай супрацы” і ўзаемадзеянне паміж знешнепалітычнымі ведамствамі, паведамляюць дзяржаўныя СМІ.

Сцвярджаецца, што суразмоўцы “спыніліся на актуальных тэмах глабальнага парадку дня і сітуацыі на Блізкім Усходзе”.

Міністры “дамовіліся працягваць знаходзіцца ў сталым працоўным кантакце па любых пытаннях у рэчышчы саюзніцкіх стасункаў Беларусі і Расіі”.

Размова адбылася напярэдадні асноўнага дня галасавання на мерапрыемстве, якое афіцыйны Мінск заве “прэзідэнцкімі выбарамі”. На момант публікацыі прэс-службы знешнепалітычных ведамстваў абедзвюх краін пра тэлефанаванне не паведамлялі.

6 снежня 2024 года ў Мінску Аляксандр Лукашэнка і Уладзімір Пуцін зацвердзілі Канцэпцыю бяспекі Саюзнай дзяржавы і падпісалі двухбаковы дагавор аб гарантыях бяспекі.

Прэзідэнт РФ паведаміў, што дагавор аб гарантыях бяспекі “вызначае ўзаемныя саюзніцкія абавязацельствы па забеспячэнні абароны, абарону суверэнітэту, незалежнасці і канстытуцыйнага ладу” дзвюх краін. Гаворка ў дакуменце сярод іншага ідзе пра “цэласнасць і недатыкальнасць тэрыторыі і знешняй мяжы Саюзнай дзяржавы, прычым з задзейнічаннем усіх існых сіл і сродкаў”.