Хрэнін заявіў аб адзінай з РФ пазіцыі па “ацэнцы выклікаў і пагроз”

15 кастрычніка, Позірк. “Наяўнасць адзінай з расійскімі калегамі пазіцыі па ацэнцы выклікаў і пагроз“ падкрэсліў 15 кастрычніка на пасяджэнні ў Маскве сумеснай калегіі абаронных ведамстваў Беларусі міністр абароны Віктар Хрэнін, паведаміла прэс-служба ведамства.

Адзначыўшы, што “ў цяперашні час у развіцці ваенна-палітычнага становішча ў Еўропе пераважае канфліктны характар, абумоўлены сутыкненнем інтарэсаў глабальных цэнтраў сілы“, Хрэнін заявіў, што“калектыўны Захад імкнецца захаваць аднапалярны светапарадак, заснаваны на правілах”.

Паводле слоў кіраўніка Мінабароны, ва ўмовах, калі “краіны Еўропы ўзялі курс на паскораную мілітарызацыю“, неабходныя “сумесная выпрацоўка новых эфектыўных мадэляў міждзяржаўных адносін, каардынацыя знешняй палітыкі і павышэнне абароннага патэнцыялу ваеннай арганізацыі Саюзнай дзяржавы”.

Міністр абароны Расіі Андрэй Белавусаў заявіў на пасяджэнні, што Масква і Мінск “штогод праводзяць больш за 150 сумесных мерапрыемстваў, палову з якіх складаюць вучэнні, трэніроўкі і зборы“. “Кульмінацыяй” гэтых мерапрыемстваў ён наваліў сумесныя стратэгічныя вучэнні “Захад-2025“, якія прайшлі ў верасні.

Паведамляецца, што “па выніках пасяджэння кіраўнікі абаронных ведамстваў Беларусі і Расіі зацвердзілі Праграму стратэгічнага партнёрства Рэспублікі Беларусь і Расійскай Федэрацыі ў ваеннай вобласці на 2026–2030 гады і План супрацоўніцтва паміж Міністэрствам абароны Расійскай Федэрацыі і Міністэрствам абароны Рэспублікі Беларусь на 2026 год”.

Зараз у Беларусі праводзіцца раптоўная праверка Узброеных сіл, аб прамежкавых выніках якой дакладваў Аляксандру Лукашэнку 15 кастрычніка дзяржсакратар Савета бяспекі Аляксандр Вальфовіч.