Італія спыніла выдачу ВНЖ за інвестыцыі для грамадзян Беларусі

8 жніўня, Позірк. Урад Італіі прыпыніў выдачу “залатых віз” для грамадзян Беларусі і Расіі, якія гатовыя інвеставаць у эканоміку гэтай краіны. Аб прынятым рашэнні паведамляецца на сайце адпаведнай праграмы Investor Visa for Italy.

Адзначаецца, што выдача беларусам і расіянам “залатых віз” спынена з 14 ліпеня “ў адпаведнасці з рэкамендацыяй Еўрапейскага саюза”.

“Залатая віза” — від на жыхарства (ВНЖ) тэрмінам на два гады, які выдаецца ў Італіі інвестарам з краін, якія не ўваходзяць у ЕС.

З 2020 года праграма Investor Visa for Italy прадугледжвае некалькі відаў укладанняў для атрымання “залатой візы”: не менш за 250 тыс. еўра — для інвестыцый у стартапы, не менш за 500 тыс. — у публічныя або непублічныя італьянскія кампаніі, ад 1 млн — у сацыяльна значныя праекты, ад 2 млн — у дзяржаўныя каштоўныя паперы.