30 снежня, Позірк. Спрошчаны парадак выдачы грамадзянам Беларусі польскага праязнога дакумента будзе дзейнічаць да 30 чэрвеня 2024 года, паведамляе Цэнтр беларускай салідарнасці са спасылкай на Упраўленне па справах замежнікаў.
Паводле інфармацыі цэнтра, раней меркавалася, што адпаведныя нормы актуальныя толькі да канца 2023 года.
У паведамленні згаданага ўпраўлення адзначана, што спрошчаны парадак уведзены дзвюма пастановамі міністра ўнутраных спраў і адміністрацыі, якія набылі моц 1 ліпеня 2023 года. Адна з іх вызваляе беларусаў ад выплаты збору за праязны дакумент, другая пашырае кола тых, хто можа прасіць пра яго выдачу, вызваляе ад неабходнасці даказваць тое, што асоба не мае магчымасці атрымаць праязны дакумент на радзіме.
4 верасня Аляксандр Лукашэнка падпісаў указ № 278 “Аб парадку выдачы дакументаў і здзяйснення дзеянняў”, які пазбавіў замежныя ўстановы Беларусі магчымасці падаўжаць тэрмін дзеяння пашпарта беларускага грамадзяніна і выдаваць новыя дакументы.
Акрамя таго, скасавана права консульстваў удзельнічаць у працэдуры адчужэння маёмасці, у тым ліку нерухомасці і аўтамабіляў. Такія здзелкі можна будзе здзяйсняць пры асабістай яўцы ў адпаведныя дзяржорганы або на падставе даверанасці, аформленай на тэрыторыі Беларусі (раней такія даверанасці афармляліся ў дыппрадстаўніцтвах).
Беларускія дэмакратычныя структуры, Еўрасаюз, ЗША, праваабарончыя арганізацыі раскрытыкавалі ўказ, скіраваны, на іх думку, на ўшчамленне правоў вымушаных эмігрантаў.
