Лукашэнка запрасіў прэзідэнта Егіпта ў Беларусь

23 ліпеня, Позірк. Запрашэнне здзейсніць афіцыйны візіт у Беларусь у любы зручны час паўтарыў Аляксандр Лукашэнка, віншуючы 23 ліпеня прэзідэнта Егіпта Абдэль Фаттаха ас-Сісі з Днём Рэвалюцыі.

На яго думку, на гэтай сустрэчы бакі маглі б працягнуць “плённы дыялог” і абмеркаваць “перспектыўныя напрамкі супрацы”.

Мінск высока ацэньвае намаганні Каіра, “скіраваныя на падтрыманне міру і стабільнасці на Блізкім Усходзе і ў Афрыцы”. “Егіпет робіць значны ўнёсак у рэалізацыю праектаў устойлівага развіцця, забеспячэнне рэгіянальнай харчовай і энергетычнай бяспекі”, — прыводзіць тэкст паслання прэс-служба віншавальніка.

Лукашэнка ўпэўнены, што далейшая сумесная праца ўрадаў дзвюх краін дазволіць “трансфармаваць існы патэнцыял у рэалізацыю ўзаемавыгадных праектаў у сферах прамысловай кааперацыі, сельскай гаспадаркі, навукова-тэхнічнага і культурнага супрацоўніцтва”.

29 красавіка Лукашэнка ўхваліў у якасці асновы для перагавораў праект пагаднення паміж урадамі Беларусі і Егіпта аб сістэме садзейнічання ўзаемнаму гандлю.

Дыпламатычныя стасункі паміж краінамі ўсталяваныя 1 лютага 1992 года. Амбасада Беларусі ў Егіпце адкрылася ў жніўні 1997 года.

Паводле даных ААН, у 2023 годзе экспарт Егіпта ў Беларусь склаў 21,5 млн долараў, імпарт з Беларусі — 79,6 млн.

Згодна з інфармацыяй МЗС, у 2021 годзе двухбаковы тавараабарот склаў 62,68 млн долараў (беларускі экспарт — 41,77 млн, імпарт — 20,91 млн). Пазнейшыя даныя адсутнічаюць.