31 ліпеня, Позірк. Паліцыя Вільнюса распаўсюдзіла фатаздымак падазраванага ў нападзе на краму “Кропка” і папрасіла дапамагчы яго апазнаць, паведамляе партал навін Delfi.
Згодна з інфармацыяй медыя, праваахоўнікі пачалі папярэдняе расследаванне паводле ч. 1 арт. 187 КК Літвы (знішчэнне або псаванне чужой маёмасці). Прычыненая шкода ацэньваецца ў 1.000 еўра.
У ноч на 28 ліпеня на сцяне творчай прасторы і крамы “Кропка” невядомы пакінуў надпіс на літоўскай мове “вяртайцеся дадому, беларускія свінні” (з трыма арфаграфічнымі памылкамі), былі разбіты вокны. Уладальнікі арганізацыі — экс-палітвязень Зміцер Фурманаў і яго жонка Вольга — лічаць здарэнне “правакацыяй лукашыстаў”.
30 ліпеня партал Delfi са спасылкай на прадстаўніка галоўнага камісарыята паліцыі Вільнюскага павета Томаса Бражэнаса паведаміў, што распачата дасудовае расследаванне па факце знішчэння або пашкоджання маёмасці. Суразмоўца медыя не выключыў, што пры высвятленні падрабязнасцяў яно “можа быць перакваліфікаванае ў распальванне нянавісці ці іншае расследаванне”.
У той жа дзень беларускі дэмакратычны лідар Святлана Ціханоўская, амбасадар па асаблівых даручэннях МЗС Літвы ў дачыненні да Беларусі Аста Андрыяўскене і дэпутат літоўскага Сейма, намеснік старшыні парламенцкай групы “За дэмакратычную Беларусь” Томас Тамілінас прыйшлі падтрымаць уладальнікаў “Кропкі”.
Фурманавы адкрылі “Кропку” ў літоўскай сталіцы ў траўні 2024 года. Там прадаюцца сувеніры, вырабленыя ў тым ліку майстрамі, якія вымушана пакінулі Беларусі пад пагрозай палітычнага пераследу.
