Польшча на працягу 33 гадзін не прапускала грузы з Беларусі на чыгуначным тэрмінале ў Малашэвічэ

4 ліпеня, Позірк. Польскі мытны тэрмінал у Малашэвічэ (Люблінскае ваяводства) пачаў прапускаць чыгуначныя грузы з Беларусі пасля 33 гадзін прастою, паведамляе RMF.

Адзначаецца, што згодна з афіцыйна інфармацыяй Мытнай службы Польшчы, на тэрмінале праводзіліся “планавыя кантрольныя мерапрыемствы для абароны мытнай тэрыторыі ЕС ад пранікнення небяспечных тавараў або рэчываў”.

У гэты перыяд змесціва кантэйнераў, якія паступалі ў Польшчу праз Беларусь (у асноўным з Кітая), “старанна правяралася”.

Такім чынам, падкрэслівае RMF са спасылкай на неназваных польскіх дыпламатаў, Польшча прадэманстравала Мінску свае магчымасці “легальна блакаваць чыгуначны транзіт з Усходу” і адправіла “сігнал Лукашэнку”.

Разам з гэтым у тэлеграм-каналах і чатах беларусаў, якія пражываюць у Польшчы, распаўсюджваецца інфармацыя, што Варшава ўвяла забарону для фізічных асоб на вываз тавараў у Беларусь. У сувязі з гэтым, як паведамляецца, супрацоўнікі мытні не выпускаюць з краіны шматлікія пакупкі, зробленыя беларусамі. Адпаведныя праверкі праводзяцца як у “зялёным”, так і ў “чырвоным” калідорах на пункце пропуску Цярэспаль.

“Позірк” звярнуўся 4 ліпеня па каментар у мытнае і памежнае ведамствы Польшчы. У Памежнай ахове паведамілі, што гэтае пытанне не ў іх кампетэнцыі, адказу мытні пакуль няма.

Паводле звестак грамадзян Беларусі, якія перасякалі мяжу, супрацоўнікі мытні спасылаюцца на ўвядзенне ЕС 29 чэрвеня новага пакета санкцый у дачыненні да Мінска.

Польскі міністр замежных спраў Радаслаў Сікорскі заявіў 22 чэрвеня, што Варшава разглядае магчымасць закрыцця ўсіх памежных пераходаў на мяжы з Беларуссю.

3 ліпеня ён сказаў, што Польшча не мае намеру закрываць мяжу з Беларуссю для пасажырскага руху.

Беларусь, паводле слоў Сікорскага, “дасылае сотні мігрантаў з расійскімі візамі”, фактычна ўручную кантралюючы колькасць тых, хто спрабуе перайсці мяжу нелегальна.

Бываюць месяцы, “калі колькасць мігрантаў раўняецца нулю”, а бывае, што мяжу спрабуе перайсці “300–400 чалавек у дзень”, дадаў ён.

Толькі ад Мінска залежыць, якімі будуць яго добрасуседскія адносіны з Польшчай, падкрэсліў Сікорскі. “Нашы базавыя патрабаванні — каб на волю выйшаў [палітвязняволены журналіст] Анджэй Пачобут і спынілася сілавая перакідка мігрантаў”, — дадаў міністр.

Аляксандр Лукашэнка, выступаючы 2 ліпеня на ўрачыстым сходзе, прысвечаным Дню незалежнасці, у чарговы раз заявіў, што нелегальныя мігранты ідуць у Еўрасаюз, таму што іх туды “паклікалі”, у Беларусі іх “лавіць не будуць”.

6 чэрвеня стала вядома пра смерць польскага вайскоўца 1-й танкавай брыгады Матэвуша Сітэка, параненага нажом 28 траўня на мяжы з Беларуссю. Паводле інфармацыі Памежнай аховы Польшчы, вайсковец зазнаў напад мігранта, які ў складзе вялікай групы спрабаваў незаконна перасекчы мяжу з боку Беларусі.

13 чэрвеня на польска-беларускай мяжы пачала дзейнічаць буферная зона, пакуль тэрмін вызначаны ў 90 дзён. Паводле інфармацыі МУС Польшчы, дзякуючы ёй колькасць спробаў парушэння мяжы скарацілася прыкладна на траціну.

Умацаванне мяжы з Беларуссю і Расіяй абмеркавалі 3 ліпеня міністр нацыянальнай абароны Польшчы Уладзіслаў Касіняк-Камыш і яго літоўскі калега Лаўрынас Кашчунас.

З вясны 2021 года на мяжы Беларусі і Еўрасаюза працягваецца міграцыйны крызіс, які ўлады Польшчы і краін Балтыі называюць “гібрыднай атакай”, арганізаванай рэжымамі ў Мінску і Маскве.

З пачатку гэтага года краіны ЕС спынілі 23,2 тыс. спробаў мігрантаў нелегальна перасекчы мяжу з боку Беларусі, у тым ліку Польшча — больш за 20 тыс., Латвія — крыху менш за 3 тыс., Літва — каля 250.

Зараз на беларуска-польскай мяжы працуюць два аўтамабільныя пункты пропуску: для пасажырскіх перавозак — Цярэспаль (з беларускага боку — Брэст), для грузавых — Кукурыкі (Казловічы).